Lóg

Løgtingslóg nr. 132 frá 28. desember 2010 um Trygdargrunn Fiskivinnunnar

Kapittul 1

Endamál og stovnan

§ 1. Settur verður á stovn ein grunnur, nevndur Trygdargrunnur Fiskivinnunnar.

Stk. 2. Grunnurin hevur til endamáls at tryggja tí einstaka fiskimanninum inntøkutrygd.

Stk. 3. Avtala kann gerast millum avvarðandi landsstýrismann og stýrið fyri Trygdargrunn Fiskivinnunnar, at grunnurin kann átaka sær fyrisitingarligar uppgávur móti gjaldi. Hesar uppgávur fevna um sjúkratrygd fyri fiskimenn, avreiðingarhagtøl, mynstringaryvirlit og flutningsstuðul.

§ 2. Inntøkur og útreiðslur grunsins verða ikki tiknar við á løgtingsfíggjarlógina.

Kapittul 2

Leiðsla og fyrisiting

§ 3. At sita fyri og hava ábyrgdina av Trygdargrunni Fiskivinnunnar, verður stýri valt. Stýrið setir stjóra at hava dagligu leiðsluna um hendi.

Stk. 2. Stýrið fær heimild til at gera avtalu við annan grunn ella stovn um umsiting.

§ 4. Stýrið hevur 7 limir, sum verða valdir av landsstýrismanninum. 3 limir skulu umboða manningarfeløgini í fiskivinnuni og verða valdir eftir uppskoti frá manningarføgunum. 3 limir skulu umboða reiðarafeløgini innan fiskivinnuna og verða valdir eftir uppskoti frá reiðarafeløgunum. 7. limurin er formaður, ið landsstýrismaðurin velur eftir tilmæli frá omanfyri nevndu feløgum.

Stk. 2. Samstundis verða vald varafólk, sum taka sæti í stýrinum, tá stýrislimi berst frá.

Stk. 3. Limirnir verða valdir fyri 4 ár ísenn, tó so, at stýrislimur verður sitandi, til nýggjur limur verður valdur.

Stk. 4. Landsstýrismaðurin ásetur í kunngerð nærri reglur um val av stýri.

Stk. 5. Stýrið ásetur sjálvt sína starvsskipan.

§ 5. Roknskaparárið er álmanakkaárið. Roknskaparførslan skal fylgja ásetingunum í ársroknskaparlógini við slíkum tillagingum, ið mettar verða neyðugar, løgtingslógini um bókhaldsskyldu og kunngerð um minstukrøv til bókhald og roknskap. Eftir tilmæli frá stýrinum kann landsstýrismaðurin í kunngerð áseta nærri reglur um roknskaparførðsluna. Roknskapurin verður almannakunngjørdur.

Stk. 2. Roknskapurin verður grannskoðaður av løggildum grannskoðara, sum stýrið velur fyri eitt ár í senn.

Stk. 3. Landsstýrismaðurin fær roknskapin frá Trygdargrunni Fiskivinnunnar.

§ 6. Trygdargrunnur Fiskivinnunnar verður teknaður av stýrisformanni ella stjóra. Stýrið kann veita umboðsfulltrú.

Kapittul 3

Inngjaldingar í grunnin

§ 7. Fæ grunsins verður fingið til vega við, at eigarar av fiskiførum, heimahoyrandi í Føroyum, ið hava loyvi til vinnuligan fiskiskap sambært lógini um vinnuligan fiskiskap, rinda eitt gjald fyri allar avreiðingar. Gjaldið verður 1% frá 1. januar 2011, og annars, um stýrið tekur undir við tí, soleiðis sum tað til eina og hvørja tíð er ásett i kunngerð av landsstýrismanninum. Gjaldið kann tó í mesta lagi vera 2% av brutto avreiðingarvirðinum.

Stk. 2. Eigarar av fiskiførum, hvørs manning ikki kemur undir ásetingarnar um inntøkutrygd, kunnu fáa undantak at rinda tað í stk. 1 nevnda gjald.

Stk. 3. Um stýrið tekur undir við ásetingunum, ásetir landsstýrismaðurin í kunngerð nærri reglur um, hvussu og nær persónar og feløg skulu rinda tað í stk. 1 nevnda gjald, og um undantak eftir stk. 2. Eisini kann verða ásett, um tað er uppboðssølan, tann, ið selur, ella tann, ið keypir fiskin fyrstu ferð, hann verður seldur, ið skal afturhalda gjaldið og rinda tað til grunnin.

Stk. 4. Rinda tey gjaldskyldugu ikki rættstundis, skal renta rindast við 1% fyri hvønn byrjaðan mánað. Gjaldið, umfram avgreiðslugjøld, renta og møguligur innkrevjingarkostnaður av hesum kunnu krevjast inn við panting.

Kapittul 4

Útgjald úr grunninum

§ 8. Fiski- og útróðrarmenn, heimahoyrandi í Føroyum, ið reka fiskifar ella mynstra við fiskifari, heimahoyrandi í Føroyum, kunnu fáa inntøkutrygd, her uppií forskot úr Trygdargrunni Fiskivinnunnar, eftir nærri ásetingum sbrt. stk. 3 og 4.

Stk. 2. Inntøkutrygdin skal vera við til at tryggja fiski- og útróðrarmonnum inntøku í tíðarbilum, tá inntøkan frá fiskivinnu svíkur.

Stk. 3. Um stýrið tekur undir við ásetingunum, ásetur landsstýrismaðurin í kunngerð nærri reglur um, hvør kann fáa forskot, inntøkutrygd, stødd á útgjaldi og treytir annars fyri hesum.

Stk. 4. Til landsstýrismaðurin ásetir reglur sbrt. stk. 3, verður útgjald frá Trygdargunni Fiskivinnunnar eftir reglum, ið landsstýrismaðurin ásetir í kunngerð.

Kapittul 5

Kærur

§ 9. Avgerðir, sum Trygdargrunnur Fiskivinnunnar hevur tikið viðvíkjandi inntøkutrygd og forskoti, kunnu kærast til kærunevndina hjá Trygdargrunni Fiskivinnunnar innan 4 vikur eftir, at viðkomandi hevur fingið fráboðan um avgerðina. Avgerðir hjá kærunevndini kunnu ikki kærast til annan fyrisitingarligan mynduleika, menn kunnu skjótast inn fyri Føroya Rætt. Freistin hjá Trygdargrunni Fiskivinnunnar at skjóta mál inn fyri Føroya Rætt er innan 6 mánaðir eru farnir frá tí, at grunnurin er kunnaður um avgerðina.

Stk. 2. Ummæli frá grunninum til kærunevndina skal vera avgreitt innan 4 vikur. Kærunevndin kann í serligum førum leingja freistina at geva ummæli.

Stk. 3. Kærunevndin hevur 3 limir, ein umboðandi manningina, ein umboðandi reiðararnar og ein formann, ið skal vera løgfrøðingur. Limirnir verða valdir av landsstýrismanninum fyri 4 ár í senn, tó so, at nevndarlimur verður sitandi, til nýggjur er valdur.

Stk. 4. Samstundis verða vald varafólk, sum taka sæti í nevndini, tá limi berst frá.

Stk. 5. Trygdargrunnur Fiskivinnunnar rindar fyri ta umsiting, sum umrøtt í stk. 3.

Kapittul 6

Eftirlit og revsing

§ 10. Til umsiting og eftirlit eftir hesi lóg kann Trygdargrunnur Fiskivinnunnar útvega sær allar upplýsingar frá TAKS og øðrum myndugleikum.

Stk. 2. Fiskimaður, fakfeløg og reiðarar hava skyldu at geva Trygdargrunni Fiskivinnunnar tær upplýsingar, grunnurin biðum um í sambandi við umsiting og eftirlit.

§ 11. Hevur fiskimaður ella reiðari givið Trygdargrunni Fiskivinnunnar skeivar upplýsingar, ella tagt um umstøður, sum hava havt týdning fyri inntøkutrygd ella forskoti, ella annars móti betri vitandi móttikið inntøkutrygd ella forskot, uttan at hava rætt til tess, kunnu upphæddir, sum av órøttum eru útgoldnar, verða kravdar afturgoldnar frá viðkomandi.

Stk. 2. Hevur reiðari medábyrgd av, at skeivar upplýsingar eru givnar, ella at tagt eru um umstøður, sum hava havt týdning fyri inntøkutrygdina ella forskot, liggur afturgjaldskyldan eisini á honum.

Stk. 3. Afturgjalding av skuld eftir stk. 1 og 2 kann fara fram við mótrokning í øðrum krøvum, viðkomandi hevur mótvegis Trygdargrunni Fiskivinnunnar.

Stk. 4. Upphæddir, sum verða kravdar inn eftir hesi grein, fella til gjaldingar ein mánað eftir, at kravið er sett fram. Krøv sambært hesi grein, umframt møguligur innkrevjingarkostnaður av hesum, kunnu krevjast inn við panting.

Stk. 5. Um stýrið tekur undir við ásetingunum, ásetir landsstýrismaðurin í kunngerð smámunarmark í samband við innkrevjing av ov nógv útgoldnari inntøkutrygd.

Stk. 6. Stýrið kann, eftir nærri ásettum reglum, gera gjaldsavtalur, herundir avskriva krøv, tá útlit ikki eru fyri at fáa allan peningin frá skuldaranum.

§ 12. Er ikki harðari revsing ásett í aðrari lóggávu, verður tann revsaður við bót, sum sambært hesi løgtingslóg gevur grunninum skeivar ella misvísandi upplýsingar.

Stk. 2. Feløg, v.m. (løgfrøðiligir persónar) koma undir revsiábyrgd eftir reglunum í kapitli 5 í revsilógini.

§ 12 a. 1) Landsstýrismaðurin kann áseta reglur um, at upplýsingar skulu skrásetast og sendast Trygdargrunni fiskivinnunnar talgilt og kann áseta nærri reglur um talgilda samskiftið.

Kapittul 7

Gildiskoma

§ 13. Handa lóg kemur í gildi tann 1. januar 2011, og samstundis fara úr gildi::

1. Løgtingslóg nr. 71 frá 23. mai 1997 um Forskotsgrunn Fiskiflotans, og fíggjarstøða grunsins verður flutt í Trygdargrunn Fiskivinnunnar.
2. Løgtingslóg nr. 112 frá 13. desember 2006 um mánaðarligan minstaforvinning til útróðrarmenn.
3. Løgtingslóg nr. 112 frá 29. desember 1998 um minstuløn og dagstudning.
4. Løgtingslóg nr. 73 frá 23. mai 1997 um Lønjavningargrunn.
5. Løgtingslóg nr. 59 frá 6. mai 1982 um gjaldsfreist og rentuskyldu Lønjavningargrunn Skipsfiskimanna.
6. Løgtingslóg nr. 91 frá 6. juni 1997 um stuðul til arbeiðsmarknaðargjøld.

Stk. 2. Samstundis sum henda lóg kemur í gildi, verða kr. 21 mió. fluttar úr Trygdargrunninum fyri avreiðingar og lønir v.m., sbr. løgtingslóg nr. 68 frá 9. juni 1988 um trygdargrunn fyri avreiðingar og lønir v.m., sum seinast broytt við løgtingslóg nr. 63 frá 25. mai 2009, í Trygdargrunn Fiskivinnunnar.

Stk. 3. Har tað í lóggávu verður víst til Lønjavningarstovuna, verður hetta at skilja sum tilvísing til Trygdagrunn Fiskivinnunnar.

Kunngerð nr. 164 frá 20. desember 2017 Kunngerð um inntøkutrygd, sum seinast broytt við kunngerð nr. 110 frá 5. juli 2022

Við heimild í § 8, stk. 3 í løgtingslóg nr. 132 frá 28. desember 2010 um Trygdargrunn fiskivinnunnar, og við undirtøku frá stýrinum, verður ásett:

Minstaløn

§ 1. Minstaløn verður veitt fiskimonnum, skrásettir í Landsfólkayvirlitinum við bústaði í Føroyum, sum eru mynstraðir við fiskiskipi, sum er 30 tons ella størri og skrásett í Føroyum.
Stk. 2. Persónum, sum vegna útbúgving fyribils hava tilhald uttan fyri Føroyar, og sum frammanundan fráflyting úr Føroyum hava verið skrásettir í fólkayvirlitinum í Føroyum í minsta lagi 5 ár tilsamans, kunnu verða veitt minstuløn sambært ásetingunum í stk. 1, hóast teir ikki hava bústað í Føroyum.
Stk. 3. Minstaløn, sambært stk. 2, verður bert veitt, um neyðugt skjalprógv frá útbúgvingarstaði fyriliggur.

Stk. 4. 1) Rætturin til minstuløn er treytaður av, at miðaldagshýran seinastu tólv mánaðirnar er í minsta lagi kr. 550.

Stk. 5. 1) 2) Er talan um nýtt fiskifar ella nýggjan eigara av fiskifari, hevur manningin rætt til minstuløn frá fyrsta degi og tólv mánaðir fram. Eftir tólv mánaðir er rætturin til minstuløn treytaður av, at miðaldagshýran seinastu tólv mánaðirnar hevur verið í minsta lagi kr. 550
Stk. 6. Fiskimenn skulu, fyri at koma undir skipanina við minstuløn, verða løntir samsvarandi galdandi sáttmálum á økinum.
Stk. 7. Tons, sambært hesi kunngerð, merkir tonsatal brutto, BT, ella skrásett brutto tons, BRT, sum til eina og hvørja tíð tilskilað á skipsins málibrævi ella máliprógvi.
Stk. 8. Fiskiskip, ella tess reiðari, hava skyldu at lata Trygdargrunni fiskivinnunnar avrokning fyri hvønn túr, so skjótt avrokningin fyriliggur, og ikki seinni enn 3 mánaðir eftir, at túrurin er endaður. Avrokningin skal eisini upplýsa manning við persónssamleika, og hvat hvør einstakur av manningini hevur fingið í hýru fyri túrin.
Stk. 9. Saman við avrokningini skal fylgja skjalprógv fyri avreiðingarvirðinum. Um eingin avreiðing er, so avrit av veiðidagbókini sum skjalprógv fyri túrin. Annars kann grunnurin krevja onnur neyðug skjalprógv fyri avrokningina.
Stk. 10. Avrokningin kann verða latin talgilt umvegis markamótið hjá grunninum.

§ 2. Minstaløn er kr. 1.275 um dagin.
Stk. 2. Minstalønin verður ikki veitt fyri teir dagar, fiskimaður er heima. Hvør túrur verður roknaður sær.
Stk. 3. 2) Minstalønin fyri ávísa túrin verður skerd við tí avrokning, undantikið frítíðarløn, sum verður latin sambært sáttmála.
Stk. 4. Minstaløn verður ikki veitt fyri fleiri dagar hvønn túr, enn avvarðandi skip á túrinum hevur brúkt av fiskidøgum.
Stk. 5. Sambært § 10, stk. 1 í løgtingslógini kann Trygdargrunnur fiskivinnunnar nýta upplýsingar frá fylgisveinaskipanini hjá Vørn í málsviðgerð síni av inntøkutrygd.

§ 3. Tá fiskimaður sambært sáttmála eigur frítíðarløn av fiskiparti, rindar Trygdargrunnur fiskivinnunnar frítíðarløn av minstulønini eftir reglunum í løgtingslóg um frítíð við løn.

Mánaðarligur minstiforvinningur til útróðrarmenn

§ 4. Mánaðarligur minstiforvinningur verður veittur til útróðrarmenn, skrásettir í Landsfólkayvirlitinum við bústaði í Føroyum, sum eru á útróðri á føroysku landleiðunum við føroyskt skrásettum fiskiførum, sum eru 110 tons ella minni.
Stk. 2. Persónum, sum vegna útbúgving fyribils hava tilhald uttan fyri Føroyar, og sum frammanundan fráflyting úr Føroyum hava verið skrásettir í fólkayvirlitinum í Føroyum í minsta lagi 5 ár tilsamans, kunnu verða veitt minstaforvinning sambært ásetingunum í stk. 1, hóast teir ikki hava bústað í Føroyum.
Stk. 3. Minstiforvinningur, sambært stk. 2, verður bert veittur, um neyðugt skjalprógv frá útbúgvingarstaði fyriliggur.

§ 5. Fiskifar, sambært § 4, skal hava avreitt í minsta lagi fyri í miðal kr. 240.000 fyri hvønn tilmeldaðan persón seinastu 12 mánaðirnar frammanundan, og í minsta lagi fyri í miðal kr. 25.000 fyri hvønn tilmeldaðan persón seinastu 3 mánaðirnar frammanundan.
Stk. 2. Er talan um nýtt fiskifar ella nýggjan eigara av fiskifari, ið ikki lýkur treytirnar í stk. 1, kann hetta far eftir 3 mánaðir koma undir skipanina, um avreiðingarvirðið í minsta lagi í miðal er kr. 60.000 fyri hvønn tilmeldaðan persón seinastu 3 mánaðirnar frammanundan. Henda regla er galdandi fyri einstaka fiskifarið í 12 mánaðir frá fyrstu tilmelding.
Stk. 3. Avreiðingarvirðið, sambært stk. 1 og 2 kann varðveitast við eigaraskifti.
Stk. 4. Eru treytirnar í stk. 1 og 2 ikki loknar vegna serligar umstøður, kann frávik gerast 2 ferðir í einum álmanakkaári. Umsókn um frávik verður viðgjørt við serligum atliti at meginregluni um, at sannlíkindi eru fyri, at fiskifarið hevði komið undir skipanina, um tað hevði verið í vinnu.
Stk. 5. Frávik, sambært stk. 4, verður bert loyvt, um skrivlig umsókn saman við neyðugum próvtilfari fyriliggur, samanber § 8, stk. 3.

§ 6. Fyri at koma undir skipanina skal bátsformaðurin fyri hvønn mánað lata Trygdargrunni fiskivinnunnar skrivliga tilmelding við navni á fiskifari og manning, undirskrivað av manning og av bátsformanni. Tilmeldingin skal vera Trygdargrunni fiskivinnunnar í hendi í seinasta lagi fyrsta arbeiðsdag í mánaðinum, sum ætlanin er at koma undir skipanina.
Stk. 2. Tilmeldingin kann verða latin talgilt umvegis markamótið hjá grunninum.
Stk. 3. Eftir at freistin í stk. 1 er farin, kann tilmeldaða manningartalið ikki økjast. Kemur nýggjur persónur við á fiskifar fyri annan, ella fer ein av fiskifari, skal skrivliga boðast frá hesum. Tilskilast skal, hvat tíðarskeið viðkomandi persónur skal vera tilmeldaður. Fráboðanir um broytingar skulu vera Trygdargrunni fiskivinnunnar í hendi í seinasta lagi saman við mánaðarligu avrokningunum.
Stk. 4. Verður tilmeldað fiskifar selt ella endaliga tikið úr vinnu, steðgar veitingin av minstaforvinningi frá hesum degi. Skylda er at boða frá hesum í seinasta lagi saman við mánaðarligu avrokningunum.
Stk. 5. Manning á fiskifari, sum kemur undir skipanina við minstaforvinningi, kann ikki í sama mánaði koma undir hesa skipan við fleiri fiskiførum, ella skipanina við minstuløn í sama tíðarskeiði.
Stk. 6. Verður ein tilmeldaður persónur mynstraður við øðrum skipi, endar øll hansara tilmelding til minstaforvinning frá hesum degi.
Stk. 7. Fiskifar, ið rør út við línu, kann tilmelda heimafólk, knýtt at fiskifarinum, til minstaforvinning.
Stk. 8. Uppgávan hjá heimafólkinum fevnir um at útvega agn, skera agn, egna, rekja línu um og at koyra línu og agn umborð til nýggjan túr.

§ 7. Mánaðarligur minstiforvinningur til útróðrarmenn er kr. 19.500.
Stk. 2. Minstiforvinningurin verður skerdur lutfalsliga í mun til tilmeldaðar dagar, túrar umborð og við 100% av tí inntøku, sum útróðrarmaðurin hevur forvunnið í fiskiparti og A-inntøku, fyriuttan minstaforvinningin.
Stk. 3. Fiskipartur verður roknaður soleiðis:

1. Sum felagsfrádráttur verður loyvdur ein botnfrádráttur av bruttoavreiðingarvirðinum.

2. Botnfrádrátturin fyri hvønn tilmeldaðan persón hvønn túr kann í mesta lagi vera kr. 3.000 við línu og kr. 1.500 við øðrum reiðskapi, tó kr. 500 á hummaraveiðu.

3. Frádrátturin kann tó ikki vera hægri enn avreiðingarvirðið hvønn túr sær. Fleiri avreiðingar sama dag verða roknaðar sum ein og sami túrur.

4. Av nettoavreiðingarvirðinum eigur manningin 45% til javnbýtis.

5. Tilmeldaðir persónar, sum ikki eru við á túrinum og persónar, sum ikki eru tilmeldaðir, eru hvørki við í frádráttinum ella býtinum.

Stk. 4. Fyri A-inntøku verður minkingin sambært stk. 2 roknað í mun til ta upphædd, sum útróðrarmaðurin sambært samtíðarskattaskipanini hevur fingið útgoldið í mánaðinum, sum minstiforvinningur verður veittur fyri, uttan mun til nær henda inntøka er forvunnin, undantikin er útgoldin minstiforvinningur.

Stk. 5. Av minstaforvinningi verður ikki veitt frítíðarløn.

§ 8. Mánaðarligur minstiforvinningur verður avroknaður umleið tann 15. í mánaðinum eftir, at hann er vunnin.
Stk. 2. Tilmeldað fiskiskip, ella tess reiðari, hava skyldu at lata Trygdargrunni fiskivinnunnar allar avrokningar so skjótt sum gjørligt eftir mánaðarlok og ikki seinni enn 3 mánaðir eftir, at mánaðurin er lokin. Avrokningin skal eisini upplýsa manning við persónssamleika, og hvat hvør einstakur av manningini hevur fingið í hýru fyri túrin.
Stk. 3. Sama tíðarfreist er galdandi fyri umsókn um frávik, samanber § 5, stk. 4.Stk. 4. Avrokningin kann verða latin talgilt umvegis markamótið hjá grunninum.

Mótrokning

§ 9. Sambært § 11, stk. 3 í løgtingslógini kann Trygdargrunnur fiskivinnunnar, í sambandi við útgjald av inntøkutrygd, mótrokna krøv, sum grunnurin hevur móti viðkomandi fiskimanni fyri ov nógv útgoldna inntøkutrygd og onnur gjøld í hesum sambandi.

Gildiskoma

§ 10. Henda kunngerð kemur í gildi 1. januar 2018.

Stk. 2. Samstundis fer úr gildi kunngerð nr. 61 frá 19. mai 2016 um inntøkutrygd.

Fiskimálaráðið, 20. desember 2017

Høgni Hoydal (sign.)

landsstýrismaður

/ Rógvi Reinert (sign.)

1. Broytt við kunngerð nr. 162 frá 14. desember 2021, har § 2 ljóðar soleiðis: "Henda kunngerð kemur í gildi 1. januar 2022"
2. Broytt við kunngerð nr. 164 frá 21. desember 2018, har § 2 ljóðar soleiðis: "Henda kunngerð kemur í gildi 1. januar 2019"
3. Broytt við kunngerð nr. 3 frá 12. januar 2021

Kunngerð nr. 121 frá 6. desember 2016, um gjald til Trygdargrunn Fiskivinnunnar

Við heimild í § 7, stk 1 og 3 í løgtingslóg nr. 132 frá 28. desember 2010 um Trygdargrunn Fiskivinnunnar, verður ásett:

§ 1. Tá fiskifør, heimahoyrandi í Føroyum, avreiða til keypara í Føroyum, her uppi í uppboðssølu, hevur keypari ella uppboðssøla skyldu at afturhalda gjaldið, ásett sambært § 7, stk. 1 í løgtingslógini og rinda hetta beinleiðis til Trygdargrunn Fiskivinnunnar.

Stk. 2. Tá fiskifør avreiða til keypara í útlandinum, skal viðkomandi reiðari rinda gjaldið beinleiðis til Trygdargrunn Fiskivinnunnar.

Stk. 3. Keypari og reiðari hava skyldu til at lata Trygdargrunni Fiskivinnunnar avreiðingarseðlar ella søluskjøl skjótast møguligt og í seinasta lagi 14 dagar eftir avreiðing.

§ 2. Gjaldið er ásett til 0,6% fyri allar avreiðingar frá 1. januar 2017.

§ 3. Gjaldið verður gjørt upp mánaðarliga, og rokning avgreidd umleið 15 dagar eftir mánaðarlok.

Stk. 2. Gjaldsfreistin er 14 dagar eftir dagfesting á faktura.

§ 4. Henda kunngerð kemur í gildi 1. januar 2017.

Stk. 2. Samstundis, sum henda kunngerð kemur í gildi, fer úr gildi kunngerð nr. 139 frá 29. desember 2010 um gjald til Trygdargrunn Fiskivinnunnar.

Kunngerð nr. 140 frá 29. desember 2010, um val av stýri fyri Trygdargrunn Fiskivinnunnar

Við heimild í § 4 í løgtingslóg nr. 132 frá 28. desember 2010 um Trygdargrunn Fiskivinnunnar, verður ásett:

§ 1. Áðrenn landsstýrismaðurin velur stýrislimir, fáa tey feløg, sum nevnd eru í hesi kunngerð boð um, innan ásetta freist, at senda inn uppskot til Fiskimálaráðið um valevni til stýrislimir og varalimir.

§ 2. Fyri manningarfeløgini verða 3 limir valdir soleiðis:

1) 1 limur umboðandi Føroya Fiskimannafelag

2) 1 limur umboðandi Føroya Skipara- og navigatørfelag

3) 1 limur umboðandi Maskinmeistarafelagið

Stk 2. Fyri reiðarar verða 3 limir valdir soleiðis:

1) 2 limir umboðandi Føroya Reiðarafelag

2) 1 limir umboðandi Meginfelag Útróðrarmanna.

Stk. 3. 7. limurin, sum er formaður, verður valdur beinleiðis av landsstýrismanninum eftir tilmæli frá feløgunum, sum nevnd eru í stk. 1 og 2.

§ 3. Henda kunngerð kemur í gildi 1. januar 2011.

Løgtingslóg nr. 14 frá 3. mars 1999 um stuðul til flutning av fiski broytt við lóg nr. 48 frá 4. apríl 2000, lóg nr. 63 frá 27. apríl 2001, lóg nr. 175 frá 21. desember 2001 og 6. mai 2013

§ 1. Landsstýrismaninum verður heimilað at útgjalda stuðul til flutning av fiski frá uppboðssølu, frá landingarstaði, tá fiskurin er seldur um uppboðssølu, og frá landingarmiðstøð til virkingar í økjum, har firðir og sund skilja.
Landingarmiðstøð er her at skilja sum landingarstað við góðkendari innvigingarskipan.

Stk. 2. Landsstýrismanninum verður somuleiðis heimilað at útgjalda útróðrarbátum stuðul til flutning av fiski frá økjum, har eingin uppboðssøla er, til nærmastu uppboðssølu.

Stk. 3. Stuðulin umfatar eisini livur og rogn.

§ 2. Landsstýrismanninum verður heimilað at útgjalda stuðul til flutning av feskum virkaðum fiski frá fiskavirkjum til avskipingingarhavn, har firðir og sund skilja.

1. Stuðul verður ikki latin til flutning av uppisjóvarfiski og gulllaksi.

Stk. 2. Stuðulin fevnir eisini um virkaða livur og rogn.

Stk. 3. Landsstýrismanninum verður heimilað at útgjalda upp til 400.000 kr. í stuðli til flutning av frystum fiski og skeljadjórum frá frystigoymslum til framleiðsluvirki, har firðir og sund skilja.

Stk. 4. Stuðul verður ikki latin til flutning av alifiski.

Stk. 5. Landsstýrismanninum verður harumframt heimilað at útgjalda stuðul til flutning av fiskahøvdum og -ryggjum til virkingar frá fiskavirkjum til framleiðsluvirki, har firðir og sund skilja.

§ 3. Landsstýrismaðurin ásetur í kunngerð flutningsstuðulin og treytir fyri útgjaldan av stuðlinum.

§ 4. Henda lóg kemur í gildi dagin eftir, at hon er kunngjørd og hevur virkna frá 1. januar 2000, og samstundis fer løgtingslóg nr. 67 frá 13. juni 1995 sum broytt við løgtingslóg nr. 112 frá 13. juni 1997 um stuðul til flutning av fiski úr gildi.

Stk. 2. § 2, stk. 3 fer úr gildi 31. desember 2002.

Kunngerð nr. 18 frá 20. februar 2009 um stuðul til flutning av fiski, broytt við kunngerð nr. 162 frá 19. desember 2011 og kunngerð nr. 37 frá 30. apríl 2013.
Við heimild í § 3 í løgtingslóg nr. 14 frá 3. mars 1999 um stuðul til flutning av fiski, sum seinast broytt við løgtingslóg nr. 32 frá 6. mai 2013, verður ásett:

§ 1. Til flutning av fiski, livur og rogn verður eftir umsókn og skjalprógvi fyri flutningi latið fiskavirki/framleiðsluvirki flutningsstuðul í kr. fyri kilo sambært fylgiskjali 1.

Stk. 2. Stuðul til flutning frá landingarmiðstøð verður bert útgoldin, um fiskurin er keyptur beinleiðis frá fiskifari, uttan nakað millumlið, og um fiskurin verður fluttur til virkingar í økjum, har firðir og sund skilja.

§ 2. Til flutning av fiski, livur og rogn frá útróðrarbátum úr økjum, har eingin uppboðsøla er, verður eftir umsókn og skjalprógvi fyri flutningi latið útróðrarbátum 14 oyru/kilo í flutningsstuðli til at flyta fisk, livur og rogn til nærmastu uppboðssølu.

§ 3. Stuðul verður ikki latin til flutning av fiski, ið er virkaður umborð.

§ 4. Umsókn um flutningsstuðul skal vera Trygdargrunni Fiskivinnunnar í hendi í seinasta lagi 2 mánaðir eftir, at flutningurin er farin fram. Umsókn, sum ikki lýkur hesa tíðarfreist, verður ikki viðgjørd.

Stk. 2. Stuðulin verður veittur føroyskum felag ella einstaklingi, ið er MVG skrásett/ur.

§ 5. Henda kunngerð kemur í gildi dagin eftir, at hon er kunngjørd, og hevur virknað frá og við 20. februar 2009.

Stk. 2. Samstundis fer úr gildi kunngerð nr. 16 frá 17. februar 2009 um stuðul til flutning av fiski.

Fylgiskjal 1