Tænastur

Minstaløn verður veitt fiskimonnum við bústaði í Føroyum, sum eru mynstraðir við fiskiskipi, ið er størri enn 30 tons og skrásett í Føroyum.

Fyri at koma undir skipanina um minstuløn, skal skipið hava eina miðal dagshýru á kr. 550,- seinastu 12 mánaðirnar frammanundan túrin.

Minstalønin er kr. 1.275- um dagin og verður hon skerd við 100% av hýruni fyri túrin. Minstalønin fellur tískil burtur, tá dagshýran er komin uppá kr. 1.275,-. Afturat minstulønini verður frítíðarløn veitt.

Minstaløn er galdandi frá tí degi farið verður, og til tann dagin komið verður aftur, tó ikki fleiri dagar enn brúktir eru sambært fiskidagaskipanini hjá Vørn.

Les kunngerðina her

Minstiforvinningurin er ein mánaðarlig veiting, ið verður veitt til persónar við bústaði í Føroyum, og sum eru á útróðri á føroysku landleiðini við føroyskt skrásettum fiskiførum undir 110 tons.

Fyri at koma í skipanina, er neyðugt at vera tilmeldaður skipaninaum minstaforvinning. Tilmeldingin skal verða okkum í hendi í seinasta lagi 1. arbeiðsdag í mánaðinum, har ætlan er um at vera í skipanini. Tilmeldingin skal vera váttað av allari manningini. Tað ber ikki til at økja um manningartalið eftir at tilmeldingarfreistin er úti. Tað ber tó til at fáa eitt nýtt fiskifólk fyri annað. Tað skal boðast skrivliga frá, um broyting er í manningini, og fráboðanin skal vera okkum í hendi í seinasta lagi saman við mánaðarligu avrokningunum.

Aftrat hesum, skal útróðarbáturin hava avreitt í minsta lagi fyri kr. 240.000 og somuleiðis kr. 25.000 fyri hvønn tilmeldaðan persón ávikavist teir seinastu 12 og 3 mánaðarnar frammanundan fyri at vera í skipanini.

Veitingin til minstaforvinning er kr. 19.500,- um mánaðin, og upphæddin verður skerd við 100% fyri tað, sum einstaki útróðrarmaðurin hevur forvunnið í fiskiparti og aðrari A-inntøku. Fyri A-inntøku verður minkingin roknað í mun til ta upphædd, sum útróðrarmaðurin sambært samtíðarskattaskipanini hevur fingið útgoldið í mánaðinum, sum minstiforvinningur verður veittur fyri, uttan mun til nær henda inntøka er forvunnin, undantikin er útgoldin minstiforvinningur. 

Frítíðarløn verður ikki veitt av minstaforvinningi.

Fiskipartur verður roknaður soleiðis:
Sum felagsfrádráttur av avreiðingarvirðinum verður loyvdur ein botnfrádráttur fyri hvønn tilmeldaðan persón hvønn túr uppá í mesta lagi kr. 3.000 við línu og kr. 1.500 við øðrum reiðskapi, tó kr. 500 á hummaraveiðu. Frádrátturin kann tó ikki vera hægri enn avreiðingarvirðið hvønn túr sær. Av nettovirðinum eigur manningin 45% til javnbýtis.

Les kunngerðina her

Fyri at javnstilla flutningsútreiðslurnar, verður veittur flutningsstuðul.

Stuðul verður latin til flutning av fiski og fiskavørum: frá uppboðssølu ella landingarmiðstøð og til framleiðsluvirki, frá útróðrarbátum og til uppboðssølu, frá fiskavirki og til avskipingarhavn, har firðir ella sund skilja.

Umsóknin skal verða Trygdargrunninum í hendi í seinasta lagi 60 dagar eftir, at flutningurin er farin fram.

Sløg av flutningi

Flutningssatsir

Til tess at fíggja útgjald av inntøkutrygd, er ásett við lóg, at grunnurin fær eitt gjald av hvørjari avreiðing hjá føroyskum fiskiførum.

Hetta gjald hevur verið 1% av brutto virðinum fyri allar avreiðingar í tíðarskeiðinum 01.01.2011 - 31.12.2016, men trygdargjaldið er nú lækkað til 0,6% fyri landingar, avreiddar frá 1. januar 2017.